Minatori përgënjeshtron Nismën Thurrje: Nuk kandidoj për deputet, mbështes Elton Debreshin

Nga Exit News
Minatori përgënjeshtron Nismën Thurrje: Nuk kandidoj për deputet, mbështes Elton Debreshin

Minatori Selim Lela ka përgënjeshtruar të mërkurën partinë Nisma Thurrje, duke thënë se ai nuk do të kandidojë për deputet dhe se mbështet kandidaturën e pavarur të minatorit Elton Debreshi.

n
postimi i Selim Leles

Nisma Thurrje postoi të martën në mbrëmje një foto të minatorit Lela duke shkruar se ai do të kandidojë në qarkun e Dibrës.

Nisma ka postuar një shkrim në emër të Lelës.

“Quhem Selim Lela, jam 26 vjeç dhe do të kandidojë për deputet në qarkun e Dibrës. Kur isha i vogël kam shkuar pas babait tim në minierë. Nuk kisha ndonjë pasion të madh për atë punë por e ndihmoja sa mundesha për të siguruar disa të ardhura jetike në muaj”, thuhet në postimin e Nismës.

Por minatori Selim Lela ka shkruar në Facebook se:

“Mbrëmë kam marrë vesh që qenkam kandidat për deputet nga Nisma Thurje. U habita shumë, se Nismën Thurje e kam takuar për çështjen e statusit të minatorit. Ata më kanë bërë një fotografi për këtë gjë, por kanë keqpërdorur besimin tim“.

Lela shprehet se ai mbështet kandidaturën e pavarur të Elton Debreshit.

“Unë nuk jam kandidat për deputet. Kandidati i pavarur i minatorëve është Elton Debreshi, të cilin e mbështesim dhe do të fitojë”.

Ai ka kërkuar falje për keqkuptimin.

Exit kontaktoi kreun e Nismës Thurrje Endri Shabani për një sqarim në lidhje me këtë postim, por nuk ka marrë ende një përgjigje.

LEXO  Rrjeti i Bashkimit Sindikal Ndërkombëtar mbështet kandidaturën e Elton Debreshit

Elton Debreshi është minatori dhe kryetar i Sindikatës së Minatorëve të Bashkuar të Bulqizës.

Ai kandidon në Dibër si kandidat i pavarur. Debreshi është shprehur se qëllimi i kandidimit të tij është Statusi i Minatorit dhe përmirësimi i kushteve të minatorëve dhe qytetarëve të Dibrës.

 

Lajme te ngjashme