Ministria e Bujqësisë ka lajmëruar fermerët dhe agronomët se kanë dy muaj afat për të aplikuar për fonde në thirrjen e tretë të programit IPARD II.
Afati për dorëzimin e aplikimeve nis nga 10 dhjetor dhe përfundon më 25 janar 2021.
Aplikimet duhet të dorëzohen vetëm në zyrat qendrore të AZHBR-së në zarfe të mbyllura, me titullin “Thirrje për dorëzimin e aplikimeve”, së bashku me titullin e masës, emrin e plotë dhe adresën e aplikantit dhe me shënimin “Të mos hapet përpara dorëzimit”.
Programi IPARD është mbështetje financiare për bujqësinë dhe zhvillimin rural nga fondet e BE-së (75%) dhe qeverisë shqiptare (25%) dhe synon përmirësimin e standardeve të biznesit në bujqësi dhe agro-përpunim, si dhe rritjen e konkurrencës, nëpërmjet modernizimit.
