Sipas dokumentave të publikuara nga Ballkanweb, Kryetar i Partisë Social Demokrate (PSD) është Engjëll Bejtja dhe jo Tom Doshi.
PSD ka dorëzuar më 12 shkurt kërkesën për regjistrim në zgjedhjet e 25 prillit pranë Komisionit Qendror të Zgjedhjeve, KQZ, me firmën e zotit Bejtja. Ndërsa, më 9 shkurt PSD ka dorëzuar të njëjtën kërkesë me firmën e Tom Doshit si kryetar partie.
Ndryshimi i kryetarit të PSD, ndoshta ka ardhur pas kërkesës së Ambasadores së SHBA-ve në Tiranë, Yuri Kim për mos lejim të kandidimit të Tom Doshit në zgjedhjet e 25 prillit.
Ambasadorja në një postim në rrjetet sociale në 8 shkurt i kërkoi KQZ të mos lejojë kandidimin e personave të shpallur non grata nga Amerika. Postimin e saj ajo e shoqëroi me vendimin e Departamentit të Shtetit për ndalimin e hyrjes në SHBA të deputetit Doshi.
Engjëll Bejtja u emërua kryetar i PSD-së në 6 qershor 2019, pas largimit të Skender Gjinushit në krye të Akademisë së Shkencave.
