Në Kosovë nxënësit do të kthehen fizikisht në shkollë në 1 shtator. Lajmi u konfirmua nga Ministria e Arsimit, Shkencës, Teknologjisë dhe Inovacionit (MASHTI) e Kosovës për Radio Evropa e Lirë të mërkurën.
Ndërkohë, edhe përfaqësues të Sindikatës së Bashkuar për Arsim, Shkencë dhe Kulturë (SBASHK) kanë shorehur gatishmërinë e mësimdhënësve për të dhënë mësim në shkolla.
Mendohet se janë rreth 300 mijë nxënës të shkollave fillore e të mesme që do t’i drejtohen bankave këtë vit.
Kreu i MASHTI-it, Arbërije Nagavci më herët ishte shprehur se kishin filluar përgatitje për të rikthyer mësimin në shkolla, por me rritjen e rasteve për shkak të përhapjes së variantit Delta nuk përjashtohet që vendimi të ndryshojë për t’iu përshtatur situatës.
Në fakt. nga 2110 persona të infektuar me Covid-19 aktualisht në Kosovë, rreth 194 prej tyre u përkasin moshave midis 10-19 vjeç.
Eventualisht, do t’i takojë Institutit Kombëtar të Shëndetësisë Publike (IKSHPK) dhe Ministrisë së Shëndetësisë që të analizojnë situatën dhe të vlerësojnë nëse masa e pranisë fizike në shkolla do të ndryshojë.
