Rusia ishte pas një sulmi kibernetik ndaj parlamentit norvegjez në gusht 2020. Sulmi kishte për qëllim hyrjen në sistemin e postës elektronike të parlamentit të vendit, tha ministrja e jashtme norvegjeze.
Më 1 shtator, parlamenti norvegjez tha se kishte pasur një sulm kibernetik dhe se ishte ndërhyrë në llogaritë e postës elektronike të disa politikanëve dhe punonjësve.
“Bazuar në informacionin e qeverisë, ne vlerësojmë se Rusia qëndron pas këtij aktiviteti”, tha Ministrja e Punëve të Jashtme Ine Eriksen Soreide në një deklaratë të martën.
“Fakti që ne dalim me një deklaratë është një sinjal i fortë… nga autoritetet norvegjeze,” u tha Soreide gazetarëve.
Kur njoftuan për herë të parë incidentin, autoritetet norvegjeze nuk thanë kush mendonin se ishte pas sulmit.
Norvegjia dëshiron të ketë një marrëdhënie pragmatike me Rusinë, por nuk mund të pranojë sulme të tilla kundër institucioneve të saj demokratike, shtoi Soreide, kur u pyet nëse sulmi do të kishte pasoja në marrëdhëniet midis Norvegjisë dhe Rusisë.
“Ne nuk mund të pranojmë që parlamenti të jetë objekt i sulmeve të tilla.”
Ministria e jashtme ruse nuk iu përgjigj menjëherë një kërkese për koment nga agjencia e lajmeve Reuters ndërsa zyrtarët në ambasadën në Oslo gjithashtu nuk ishin menjëherë të disponueshëm për koment.
Në vlerësimin e tij vjetor të kërcënimit të botuar në Shkurt, Shërbimi i Sigurisë së Policisë së Norvegjisë (PST, agjencia e inteligjencës vendase) paralajmëroi për “operacionet e rrjetit kompjuterik” duke thënë se përfaqësonin një “kërcënim të vazhdueshëm dhe afatgjatë për Norvegjinë”.
Në vitin 2018, Norvegjia anëtare e NATO-s arrestoi një shtetas rus të dyshuar për mbledhjen e informacionit në rrjetin e internetit të parlamentit, por e liroi atë disa javë më vonë për shkak të mungesës së provave.
Të dy vendet, të cilat ndajnë një kufi të përbashkët në Arktik, kanë gëzuar përgjithësisht marrëdhënie të mira, por ato janë acaruar që nga aneksimi rus i Gadishullit të Krimesë në 2014.
