Shqipëria ka ende punë për të bërë për sa i përket evidentimit dhe luftimit të sëmundjeve infektive dhe shpërhapjes së epidemive. Këto janë përfundimet e një studimi të Organizatës Botërore të Shëndetësisë (OBSH).
Studimi, i bërë në të gjithë vendet, vëzhgon disa tregues si: evidentimi dhe përhapja e viruseve, parandalimi i sëmundjeve infektive dhe trajnimi i profesionistëve për dalluar epidemitë e reja, – për të dhënë në përfundim nivelin e gadishmërisë së secilit vend për të luftuar epidemitë.
Shqipëria është vlerësuar mesatarisht me 62 pikë, në një sistem pikëzimi nga o deri në 100 pikë, ku 0 tregon nivelin më të ulët të gadishmërisë dhe 100 nivelin më të lartë, – pra kategorizohet në vendet që kanë ende punë për të bërë.
Në secilin prej indikatorëve që vëzhgohen, Shqipëria vlerësohet me:
- 48 pikë në ndalimin e përhapjes së viruseve;
- 57 pikë për mbrojtje nga sëmundje të tjera;
- 73 pikë për evidentimit e viruseve;
- 68 pikë në kriterin e parandalimit.
Sipas gjetjeve të raportit vetëm 430 milionë qytetarë, pra 6 për qind e popullsisë së botës, jetojnë në vende të mirë përgatitura për të parandaluar përhapjen e një epidemie të mundshme.
Këto vende janë Australia, Belgjika, Finlanda, Omani, Koreja e Jugut, Sllovenia, Emiratet e Bashkuara Arabe dhe SHBA-të.
Po ashtu, OBSH paralajmëron se një virus mund të përhapet nga një fshat i vogël në të gjithë botën brenda 36 orësh dhe se çdo ditë ka rreth 100 viruse të reja përreth botës. Këto fakte e bëjnë më të nevojshëm përmiresimin e të gjithë sistemit që evidenton dhe parandalon përhapjen e sëmundjeve infektive.
