Partia Demokratike, LSI dhe partitë e tjera opozitare do të marrin pjesë në konferencën për reformën zgjedhore, organizuar nga misioni i OSBE-së në Tiranë dhe Komisioni për reformën zgjedhore.
Vendimi u mor sot gjatë mbledhjes së kryetarëve të partive opozitare.
Në bisedimet që do të nisin nesër më 25 shtator, opozita do të përfaqësohet nga tre përfaqësues teknik: Ivi Kaso, Sekretari për Zgjedhet në Partinë Demokratike; Muharrem Caka, përfaqësuesi ligjor i LSI në KQZ dhe Arjan Madhi Nënkryetari i Partisë Republikane.
Pas mbledhjes me aleatët, kryetarja e Lëvizjes Socialiste për Integrim Monika Kryemadhi tha për median se opozita po punon për zgjidhjen e krizës, problemi dhe shkaktarja kryesore e së cilës është Edi Rama dhe qeveria e tij.
Pas takimit me aleatët, Zoti Basha takoi kreun e OSBE-së Bernd Borchard për t’i bërë të ditur vendimin e opozitës dhe për të diskutuar për krizën politike.
Sipas njoftimit zyrtar, në konferencën e 25 shtatorit do të diskutohet për hartimin e një reforme zgjedhore, që ndër të tjera merr parasysh dhe rekomandimet OSBE/ODIHR-it për zgjedhjet.
