PD, Bardhi: Rendi dhe siguria prioritet kryesor për qeverinë e re të PD

Nga Exit News
PD, Bardhi: Rendi dhe siguria prioritet kryesor për qeverinë e re të PD

Partia Demokratike akuzoi kryeministrin Edi Rama se ka dështuar si kryeministër, duke ngritur shtetin e “gangsterëve me banda që vriten ne mes të ditës e me kriminelë që nuk kapen”.

Sekretari i Përgjithshëm i PD-së, Gamend Bardhi e quajti atentatin me tritol të martën ndaj Preng Gjinit, “një sulm terrorist”, i ndodhur si “pasojë e politikës së Edi Ramës “hëngshin kokat e njëri-tjetrit”.

“Kryeministri në ikje ka dështuar me vendosjen e rendit dhe sigurisë, sepse ai erdhi dhe qëndroi në pushtet, duke patur ortak krimin dhe bandat”, u shpreh për median Bardhi, ditën e mërkurë.

Ai u shpreh se Rama i ka dhënë kriminelëve leje, licensa, tendera, dhe me paratë e tyre financohen fushatat zgjedhore.

“Tek qytetarët sot mbizotëron opinioni se shteti mungon dhe territori është lënë nën thundrën e krimit, duke krijuar një situatë të përkeqësuar për sigurinë e jetës së tyre”, shtoi Bardhi.

Bardhi akuzoi kryeministrin se po përdor policinë për të dhunuar “opozitën, protestuesit, studentët, naftëtarët, që protestojnë për të drejtat e tyre, por është kokëulur përballë krimit”.

Ai premtoi se qeveria e PD, “e dalë nga zgjedhjet e 25 Prillit, do të ketë rendin dhe sigurinë publike prioritet kryesor të saj”.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>