Për herë të parë në Shqipëri, në luginën Vjosë-Nartë u pa shpendi i veçantë këmbëqirithi i përhimët. Ky është një lloj i veçantë zogu, i cili gjendet në Finlandë dhe Siberi, dhe gjatë dimrit migron në Afrikë, Azinë e Jugut dhe Australi. Ky shpend u pa më 30 maj në Kriporen e Skrofotinës, në zonën e Pejzazhit të Mbrojtur Vjosë-Nartë.
“Vrojtimi i Këmbëqirithit të përhimtë është rastësor në Shqipëri dhe shpendi duhet të konsiderohet si aksidental. Rruga e zakonshme e shtegtimit të tij nga Afrika perëndimore është ajo Mesdheut Lindor dhe Detit të Zi ndërkohë që vendet e folezimit ndodhen në skajin e Evropës Verilindore dhe Azinë Veriore”, shkruan shoqata shqiptare ornitologjike në njoftimin e saj.
Lugina Vjosë-Nartë është një zonë e mbrojtur në jug-perëndim të Shqipërisë, afër qytetit të Vlorës. Ajo ka një sipërfaqë prej 194 kilometra katrorë dhe përfshin ligatinatat, lumenjtë, kënetat, shtretërit kallamishte, pyjet, plazhet dhe ishuj.
Në këtë zonë gjenden 741 specie të ndryshme kafshësh, përfshirë 32 gjitarë, 194 zogj, 26 zvarranikë, 9 amfibë, 90 peshq, 390 jovertebrorë dhe 26 specie të rralla.
Disa nga speciet më interesante që banojnë në zonë përfshijnë pelikanin, flamingon, çakallin e artë dhe delfinin.
Sipas shoqatës, dallimi i këtij shpendi të veçantë në Nartë tregon rëndësinë e luginës së Vjosë-Nartë “si një zonë tepër të rëndësishme për shpendët shtegtarë në Shqipëri dhe në Adriatikun Lindor”.
Botuar më parë në The Balkanista.
