Ministria e Shëndetësisë bëri me dije të hënën se asnjë qytetar nuk ka humbur jetën nga Covid-19 në 24 orët e fundit në vend.
Në të njëjtin interval nga 4262 teste të kryera, janë regjistruar 397raste infektimiesh.
Pavarësisht kësaj, konstatohet një rritje e rasteve aktive dhe shtrimeve, ku aktualisht janë 5 792 pacientë aktivë në të gjithë vendin dhe 84 të shtruar te Spitali Infektiv .
Pjesa më e madhe e rasteve aktive janë të përqëndruara në Tiranë, 2231 ose rreth 39%, pasuar nga Shkodra me 928 dhe Vlora me 559 infektime. Njësoj edhe me hartën infektimeve të reja të identifikuara, ku këto 3 qytete dominojnë.
Ndërkohë, janë shëruar 178 qytetarë gjatë 24 orëve të fundit, duke e çuar numrin e të shëruarve në 131 451 që nga fillimi i epidemisë.
Deri tani Ministria e Shëndetësisë nuk ka lëshuar statistika rreth moshës së të infektuarve apo viktimave.
