Policia Rrugore e ka kapur publikun në befasi të mërkurën kur ka njoftuar lëshimin e qindra gjobave ndaj shoferëve të transportit urban.
Janë rreth 207 shoferë të kapur në shkelje të ndryshme si shkelje e itinearit dhe/apo destinacionit të miratuar, mungesë e arsimit profesional, tejkalim kapacitetesh të pasagjerëve si dhe të meta teknike apo mungesë siguracioni.
Mes tyre, 14 drejtues janë gjetur duke drejtuar urbanin në gjendje të dehur.
Kjo është hera e parë që publiku dëgjon për marrje masash ndaj shofëreve të urbanëve, paçka se problematikat “e zbuluara” vetëm së fundmi nga policia janë lehtësisht të konstatueshme nga qytetarët në përditshmërinë e tyre.
Madje, gjatë pandemisë kritikat mbi shërbimin urban janë rritur ndjeshëm për shkak të mundësisë së kontraktimit të virusit gjatë udhëtimit në urbanet e ngjeshur, me mungesë ajrimi, por deri tani ato kanë rënë rregullisht në vesh të shurdhër.
Po ashtu, megjithse për kushtet e transportit urban janë përgjegjëse kompanitë e kontraktuara nga bashkia Tiranë, në njoftimin e policisë nuk flitet për masa ndaj tyre, por vetëm ndaj shoferëve.
Masat vijnë një muaj pasi kryetari i bashkisë, Erion Veliaj njoftoi mbi një projekt, i cili do të financohet nga qeveria gjermane, për të ristrukturuar transportin urban në Tiranë.
Pasi rriti çmimin e biletës së urbanit në fund të vitit 2015, Veliaj shprehu dëshirën për “të thyer monopolin” e kompanive të transportit urban duke krijuar një kompani të bashkisë për të menaxhuar transportin urban.
