Qeveria shqiptare ka arritur, të mërkurën, marrëveshje në parim me kompaninë Pfizer për të nisur vaksinim në janar.
Lajmin e bëri të ditur kryeministri Rama.
Përmes një postimi në Twitter, Rama shkroi se qeveria ka ‘dakordësuar në parim pas kontaktesh intensive nga të katër anët, tekstin e marrëveshjes me Pfizer për të nisur vaksinimin në janar’.
Nga postimi i kryeministrit kuptohet se nuk ka ende një marrëveshje të nënshkruar, numër të saktë dozash apo se kur mund të nisë saktësisht vaksinimi.
Kryeministri Rama akuzoi Bashkimin Europian se la jashtë vëmendjes Shqipërinë, por se ‘ne ia dolëm sidoqoftë me diplomaci e me këmbëngulje të mos mbetemi mbrapa askujt.’
