Raporti i DASH: Shqipëria nuk plotëson kushtet minimale për të luftuar trafikun njerëzor

Raporti i DASH: Shqipëria nuk plotëson kushtet minimale për të luftuar trafikun njerëzor

Departmenti amerikan i Shtetit publikoi të premten raportin për Trafikimin e Personave në botë gjatë vitit pandemik.

Raporti detajon përpjekjet e qeverive për të parandaluar dhe luftuar trafikun e personave në botë.

Ai thekson se pandemia pati efekte negative në këto përpjekje, për shkak se një pjesë e mirë e qeverive devijuan fondet për të luftuar virusin, që rezultoi “në uljen e masave të mbrojtjes dhe ofrimit të shërbimeve për viktimat, zvogëlimi i përpjekjeve parandaluese dhe pengesat për hetimet dhe ndjekjet penale të trafikantëve”.

Në kapitullin dedikuar Shqipërisë, raporti thekson qysh në fillim se qeveria shqiptare nuk përmbush standardet minimale për eleminimin e trafikimit, megjithëse “po bën përpjekje të konsiderueshme”.

DASH konstaton se qeveria nuk dënoi asnjë trafikant, identifikoi më pak viktima dhe uli financimin ndaj OJQ-ve.

“Qeverisë i munguan përpjekjet e kontrollit për popullatat në nevojë – veçanërisht migrantët, azilkërkuesit, individët në seks komercial dhe fëmijët – dhe njësitë lëvizëse të identifikimit të viktimave (MIU) mbetën të pafinancuara dhe të stafit, megjithëse identifikonte shumicën e viktimave çdo vit”, shkruhet në raport.

Megjithëse në raport përgëzohet formimi i SPAK, që mund të luftojë treafikun në kuadër të krimit të organizuar, ai shton se prokurorët e rretheve nuk kanë përvojë dhe kapacitet të ndjekin rastet e trafikimit.

Në disa raste vëzhguesit vunë re se autoritetet ngatërronin prostitucionin me trafikun e personave e në raste të tjera ato mendonin se trafikimi duhet të ketë element të trafikut ndërkombëtar.

“Burimet e kufizuara dhe qarkullimi i vazhdueshëm brenda zbatimit të ligjit krijuan pengesa shtesë për ruajtjen e kapacitetit për të hetuar trafikimin,” lexon raporti.

OJQ-të, të cilat funksionojnë si qendra strehimi për viktimat funksionojnë nën kufizime financiare dhe  mbështeten tek burimet e jashtme për kostot e funksionimit.

Edhe financimi i pakët shoqërohet me vonesa dhe zbatimi i programeve sociale në bazë bashkish inkurajon korrupsionin nga ana e zyrtarëve lokal.

Një tjetër problem që kjo sillte ishte se bashkia i jep përparësi OJQ-ve që operojnë në rang lokal, e jo në rang kombëtar.

Në raport gjithashtu shkruhet se “Qeveria raportoi se linja telefonike e Drejtorisë së Policisë së Shtetit nuk funksiononte në vitin 2020”.

Megjithatë, sipas DASH, përpjekjet e qeverisë për të luftuar trafikun, krahasuar me perjudhën e mëparshme, janë rritur.

DASH rekomandon që qeveria:

– Të  ndjekë penalisht dhe të dënojë trafikantët – përfshirë zyrtarë;

– Të rrisë përpjekjet për të kontrolluar kategoritë në vështirësi dhe për të trajnojë zyrtarët e vijës së parë për identifikimin e viktimave;

– Të trajnojë prokurorët dhe zyrtarët gjyqësorë, veçanërisht prokurorët e rretheve, për hetimin dhe ndjekjen penale të çështjeve të trafikimit;

– Të rrisë fondet dhe të krijojë mekanizma për shpërndaje të fondeve në strehëzat e OJQ-ve për viktimat e trafikimit;

– Të mundësojë inspektimin e bizneseve informale, akses në shërbimet e shëndetit mendor për viktimat dhe arsimimin për fëmijët viktima.

 

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>