Muajin e ardhshëm mund të ketë deri në 200 mijë persona të pushuar nga puna si pasojë e krizës së koronavirusit, tha ish-deputeti i PD-së Agron Shehaj, në një interviste për Ora News.
Zoti Shehaj tha se prioritet për qeverinë duhet të jenë njerëzit e punësuar dhe jo bizneset:
“Unë mendoj se prioriteti numër një nuk duhet të jenë bizneset, por njerëzit. Njerëzit që janë të punësuar në këto biznese dhe që ka mundësi që të humbasin vendin e punës muajin e ardhshëm. Unë kam frikë që muajin e ardhshëm mund të kemi nga 100 mijë deri në 200 mijë të pushuar nga puna, si pasojë e krizës ekonomike.
Rasti i restoranteve dhe bareve është më i prekur nga pasojat e koronavirusit. Ne duhet të mendojmë për të punësuarit, pastaj për biznesit. Të punësuarit nuk do kenë një rrogë muajin e ardhshëm, një numër i madhe i tyre nuk do të kenë sepse nuk kanë punuar sepse bizneset nuk i mbajnë në punë dhe nuk i garantojnë rrogat”.
Për Shehajn, masa prej 260 mijë lekësh që qeveria do të paguajë për punonjësit në bizneset e vogla është shumë e pamjaftueshme:
“Masa prej 260 mijë lekësh është për 30 mijë biznese dhe 60 mijë të punësuar. Në Shqipëri ka 500 mijë të punësuar në sektorin privatë. Janë me qindra e mijëra ata që kanë nevojë për ndihmë. Të alokosh 12 mln euro për qindra mijëra të punësuar është qesharake, është shumë pak”.
