Shqipëria ka shkelur një nga kushtet e Marrëveshjes së Parisit duke mos dërguar planet e saj të përcaktuara në shkallë kombëtare (NDC) për emetimet në Sekretariatin e Konventës Kuadër të Kombeve të Bashkuara për Ndryshimet Klimatike.
Sipas kushteve të marrëveshjes, Shqipërisë iu kërkua të paraqiste këto kontribute deri më 30 korrik, por nuk arriti ta bëjë këtë.
Patricia Espinosa, Sekretare Ekzekutive e UUNFCCC, tha se kjo nuk është aspak e kënaqshme dhe se “NDC -të përbëhen nga planet kombëtare të veprimit për klimën që secili vend harton për të adresuar ndryshimet klimatike”.
Këto raporte janë integrale sepse, kur kombinohen, krijojnë një regjistrim të saktë të veprimit global në ndryshimin e klimës. Çdo vend supozohet t’i botojë ato çdo pesë vjet.
Bosnja dhe Hercegovina, Mali i Zi dhe Maqedonia e Veriut të gjithë kanë premtuar të rrisin shkurtimet e tyre të emetimeve në vendet e tyre përkatëse.
Përveç Shqipërisë, vetëm Serbia nuk ka arritur të dorëzojë raportin e saj në rajonin e Ballkanit.
Espinosa tha se niveli i ambicies së treguar nga nënshkruesit duhet të rritet.
“Një nga gjetjet kryesore në versionin fillestar të raportit të sintezës tregoi se përpjekjet kolektive janë shumë më pak se ajo që kërkohet nga shkenca për të kufizuar një rritje të temperaturës globale deri në fund të shekullit, e lëre më objektivin e dëshiruar prej më pak se 1.5C. Unë me të vërtetë shpresoj se vlerësimi i rishikuar i përpjekjeve kolektive do të zbulojë një tablo më pozitive”, tha Patricia Espinosa, Sekretare Ekzekutive.
Ajo shtoi se valët e nxehtësisë, zjarret, thatësira dhe përmbytjet e fundit përbëjnë një “paralajmërim të tmerrshëm se shumë më tepër duhet bërë dhe shumë më shpejt”.
Espinosa i bëri thirrje Shqipërisë dhe vendeve të tjera të dyfishojnë përpjekjet e tyre dhe të respektojnë angazhimin e tyre ndaj Marrëveshjes së Parisit, e cila është ligjërisht e detyrueshme.
Ndërkohë, Shqipëria po përjeton një verë jashtëzakonisht të nxehtë, me zjarre që shkatërrojnë pjesë të jugut të vendit. Një person ka humbur jetën dhe miliona euro dëme janë shkaktuar në prona dhe tokë bujqësore. Zjarret aktualisht po kërcënojnë Parkun Kombëtar Llogora.
