Stuhia në Spanjë e quajtur Filomena, shkaktoi të dielën vdekjen e katër personave.
Autoritetet thonë se dy njerëz vdiqën nga temperaturat e ulëta. Ndërsa dy të tjerë po udhëtonin me një makinë në Malaga, dhe si pasojë e motit të keq makina u përplas dhe ata humbën jetën.
Reshjet e mëdha të borës kanë ndërprerë udhëtimet ajrore, tokësore dhe hekurudhore. Rreth 600 rrugë në Spanjë u bllokuan në trafik, duke bllokuar një numër të madh automjetesh.
Më shumë se 1,500 njerëz janë shpëtuar, sipas një deklarate nga policia dhe grupet e shoqërisë civile.
“Ne aktualisht po përballemi me stuhinë më të keqe në 50 vjet,” tha Ministri Spanjoll i Brendshëm Fernando Grande-Marlaska Gómez në një deklaratë për media.
Më tej ai tha se, përkundër kushteve jashtëzakonisht të këqija të motit, humbja financiare deri më tani është e kufizuar.
Për shkak të reshjeve të vazhdueshme të borës për 30 orë, pemë janë shkulur dhe automjetet janë dëmtuar rëndë.
Sipas meteorologëve, reshjet e borës do të vazhdojnë deri në fillim të javës.
Stuhia Filomena ka bërë që shumë pjesë të Spanjës të mbulohen nga dëbora dhe autoritetet kanë vendosur më shumë se gjysmën e vendit në emergjencë.
Kryeqyteti, Madrid, është një nga zonat më të goditura, me deri në 20 centimetër dëborë.
