Të hënën do të mbahet takimi mes Greqisë dhe Turqisë, raportojnë mediat greke.
Dy shtetet do të diskutojnë mbi konfliktin për kufirin detar.
Sipas medieve greke delegacioni i Athinës ka arritur në Turqi dhe takimi do të zhvillohet në një ambient me pamje nga Bosfori.
Sa i takon synimeve të Turqisë, në mediat greke shkruhet se ato janë të njohura.
“Kthesa e papritur e udhëheqjes turke është e lidhur drejtpërdrejt me dy faktorë kryesorë”, shkruajnë mediat greke.
Sipas tyre e para është frika e sanksioneve të BE në mars ndaj Ankarasë, që do i jepte një goditje vendimtare ekonomisë turke, me koston për qeverinë Erdogan të kuptueshme lehtësisht.
Faktori i dytë ka të bëjë me ndryshimin e qeverisë në Shtetet e Bashkuara dhe pasigurinë rreth synimeve të Uashingtonit nën drejtimin e Joe Biden, shkruan media greke Tanea.
Ky është raundi i ri, i 61-të i bisedimeve për eksplorimet në det midis Athinës dhe Ankarasë.
Kryeministri grek, Qiriakos Mitsotaqis tha më herët se ai shpresonte që bisedimet të niseshin aty ku u ndalën në mars të vitit 2016.
Mitsotakis tha se Athina kërkon një marrëdhënie të frytshme me Ankaranë, duke shtuar se të dy vendet do të diskutojë çështjen e zonave detare të diskutueshme.
Greqia dhe Turqia prej disa muajsh kanë shkëmbyer akuza dhe kërcënime për sa i përket konfliktit për ndërhyrjet e Turqisë në ujrat grekë.
Po ashtu, Turqia ka paralajmëruar se një zgjerim i detit nga ana e Greqisë në lindje do të ishte një shkak për luftë.