Në shtator 2015, kreu i Gjykatës së Apelit të Tiranës Alaudin Malaj u padit nga Inspektoriati i Deklarimit të Pasurive (ILDKPKI) për krijimin e një skemë mashtrimi, për të mbuluar burimin e pasurisë së tij prej të paktën 1,7 milionë eurosh.
Në janar 2016, gjyqtari i Gjykatës së Tiranës Artan Gjermeni u plagos në rrethana të paqarta. Plagosja e tij u zbulua pasi gjyqtari kërkoi trajtim mjekësor në spitalin publik. Ai deklaroi para policisë se ishte plagosur aksidentalisht në garazhin e tij. Policia nuk gjeti asnjë element për të mbështetur këtë deklarim, ndërkohë, në makinën e tij ajo gjeti rreth 20 mijë euro.
Për rastin e Zoti Malaj, mediat njoftuan fillimisht shkurtimisht padinë e ILDKP-së në prokurori, por shumica e tyre e hoqën lajmin nga faqet e tyre online brenda pak orësh. Që atëherë, nuk ka patur asnjë informacion apo përmendje të hetimit nga pothuajse asnjë media.
Për rastin e Zotit Gjermeni, mediat fillimisht informuan mbi ngjarjen në mbrëmjen që ajo ndodhi, dhe të nesërmen për mundësinë e hetimit të gjyqtarit për deklarim të rremë dhe për paratë e gjetura në makinën e tij. Që atëhere mediat nuk kanë raportuar apo përmëndur më rastin.
Mediat, që edhe për rastet e kronikës së zezë raportojnë pa fund detaje të hetimit, të jetës, së të shkuarës së familjeve, deri në bezdi, për rastet e gjyqtarëve kanë zgjedhur të heshtin. Kanë heshtur edhe analistët që flasin për ditë për korrupsionin dhe drejtësinë. Heshtur kanë edhe politikanët që flasin për reformën në drejtësi.
I njejti skenar ndodhi edhe në rastin e gjyqtarit Gjin Gjoni, i akuzuar dhe hetuar për pastrim aprash dhe burim të paligjshëm të pasurisë së tij prej miliona euro. I vetmi lajm për të qe kur u padit në prokurori nga ILDKP dhe kur u njoftua që u shpall i pafajshëm. Pafajësia e dyshimtë e tij nuk ngjalli asnjë diskutim, asnjë revoltë, asnjë lloj reflektimi tek askush.
Kështu duket se do ndodhë edhe për dy gjyqtarët Malaj dhe Gjermeni.
