Toni Bler u akuzua se ka ndihmuar disa zyrtarë të huaj, nën hetim apo të dënuar për korrupsion, të merrnin nënshtetësi serbe nga kryeministrat Aleksandar Vuçiç dhe Ana Brnabiç.
Deputetja e Parlamentit të Serbisë Marinika Tepiç ka akuzuar ish-kryeministrin e Britanisë së Madhe Toni Bler se klientët e tij, të akuzuar për korrupsion, ai i ka shpëtuar nga drejtësia në vendet e tyre duke i strehuar në Serbi. Sipas deputetetes, kryeministrat Vuçiç dhe Brnabiç, të cilët marrin shërbimet e konsulencës së Toni Blerit, u kanë dhënë këtyre të akuzuarve nënshtetësinë serbe, kontrata të majme qeveritare, dhe kanë bllokuar ekstradimin e tyre për të dalë përpara drejtësisë.
Toni Bler ka qenë këshilltar i Aleksandar Vuçiçit, kur ky ishte kryeministër (2014–2017), dhe vazhdon të jetë këshilltar i Kryeministres Ana Brnabiç. Ai ofron shërbime konsulence për disa regjime me demokraci të dobët ose jodemokratike.
Rasti i fundit i dhënies së nënshtetësisë serbe ishte ai ndaj ish-kryeministres së Tajlandës Yingluck Shinawatra, e cila u dënua në vendin e saj për korrupsion në miliarda dollarë. Pasi qëndroi e fshehur në Londër dhe Dubai që nga viti 2017, ajo i shpëtoi dënimit duke u strehuar në Serbi, ku kryeministrja Ana Brnabiç i dha edhe pasaportën serbe.
Në akuzat e saj ndaj Blerit, Vuçiçit dhe Brnabiçit, deputetja serbe Marinika Tepiç sjell edhe rastin e ish-kryeministrit rumun Viktor Ponta, i cili akuzohej në Rumani për korrupsion, ndërkohë që këshillohej nga Toni Bler. Mes furtunës së akuzave ndaj tij, Ponta u largua për në Serbi, ku u bë “këshilltar nderi” i kryeministrit Vuçiç dhe mori pasaportën serbe. Ponta akuzohej se kishte shtyrë biznesmenin Sebastian Gita t’i paguante 220 mijë euro Toni Blerit në këmbim të përfitimive nga qeveria rumune.
Edhe vetë Gita ia mbathi për në Serbi, kur doli një urdhër arresti për të. Ai mori disa vlerësime nga qeveria serbe, Vuçiçi i dha azil politik, disa kontrata të majme miliona-dollarëshe me qeverinë, si dhe refuzoi ta ekstradonte në Rumani.
