Varianti indian i virusit Covid-19 rrezikon programet e lehtësimit të masave në vendet evropiane për perjudhën e verës.
Një studim nga Imperial College London në Britani tregon që varianti Delta ka ndikuar në rritjen me 50% të rasteve të reja të infektimeve në vend që nga maji.
Të dhënat mbështesin vendimin e kryeminstrit Boris Johnson për të shtyrë lehtësimin e masave antiCovid, justifikuar pikërisht me frikën ndaj versionit indian të virusit dhe nevojës për të vaksinuar sa më shumë njerëz.
“Prevalenca po rritet në mënyrë eksponenciale, e nxitur nga moshat më të reja … dhe duket se po dyfishohet çdo 11 ditë. Qartësisht, ky është një lajm i keq,” citohet nga Reuters Steven Riley, profesor i dinamikës së sëmundjeve infektive, Imperial College London.
Për të përmbysur këtë trend, ekspertët këshillojnë fillimin e vaksinimit për moshat më të reja.
Britania ka patur një nga programet më të suksesshme të vaksinimit në botë, me mbi gjysma e popullsisë së rritur që është vaksinuar plotësisht.
Ministri i Shëndetësisë Matt Hancock, duke iu referuar studimit deklaroi se ai tregonte se qeveria kishte marr vendimin e duhur.
“Këto zbulime nxjerrin në pah kontekstin e zymtë në të cilin morëm vendimin e vështirë për të vonuar Hapin 4 të udhërrëfyesit nga bllokimi,” u shpreh ai për mediat.
Ai shtoi se njerëzit duhet të bëjnë pak më tepër durim, në mënyrë që të rritet numri i vaksinimeve, si e vetmja mënyrë për të bërë një hapje të sigurtë të vendit.
Rikujtojmë se varianti indian i koronavirusit rezulton me një trasmetueshmëri shumë të lartë, gjë që e bën atë statistikisht më të rrezikshëm, pavarësisht se studimet thonë se nuk është kërcënim më i madh fizikisht për pacientet se versionet e tjera të identifikuara.
