Vazhdojnë dorëheqjet në Hipotekën Vlorë, largohet drejtori i 14-të

Nga Exit News
Vazhdojnë dorëheqjet në Hipotekën Vlorë, largohet drejtori i 14-të

Pas 3 ditësh punë, Viola Hima, drejtuesja e sapo emëruar e Hipotekës Vlorë, është larguar nga detyra.

Hima është drejtuesja e gjashtë që dorëhiqet nga ky post drejtues në 9 muajt e fundit dhe e 14-ta që prej vitit 2013.

Ajo u emërua të premten, më 29 maj dhe u dorëhoq të hënën në 1 qershor.

Hima u emërua në këtë post për të zëvendësuar Bilbil Aliajn, i cili dha dorëheqjen pas 3 muaj punë.

Drejtori i Agjencisë Shtetërore të Kadastrës, Artan Lame ka lënë të kuptohet vazhdimisht se largimet nga hipoteka e Vlorës janë rezultat i ndërhyrjes për të larguar personat që nuk zbatojnë ligjin nga zyrat e pasurive të paluajtshme.

Por investigime të ndryshme në media, kanë treguar se në hipotekën e Vlorës nuk bëhet fjalë për shkarkime.

Dorëheqjet mediat i kanë lidhur me çështjen e pronësisë së një zone në plazhin e Jalit, atje ku qeveria i ka dhënë kompanisë Soleil & Sea leje për ndërtimin e 3 komplekseve hotelerie si investim strategjik.

Pretendimi i pronësisë nga familja e Kristo Gjokës ka bërë që ndërtimi të bllokohet. Për këtë çështje ka patur disa vendime gjykatash, zbatimi dhe mos-zbatimi i të cilave ka përfshirë një pjesë të zyrtarëve të hipotekës së Vlorës në shpërdorim detyre. Vetë ish-drejtori hipotekës, Taulant Cenameti, është paditur nga familja Gjoka si i përfshirë në këtë çështje.

Resortet turistike janë mbështetur nga qeveria si investime strategjike, për të cilat, prej vitit 2015, janë parashikuar me ligj lehtësime dhe përparësi për konsolidim të titujve të pronësisë, që do të thotë se një investitor strategjik mund të ndërtojë më lehtë se një individ apo biznes i zakonshëm.

Tre vite më parë gazetarja Lindita Çela raportoi se një pjesë e këtyre investimeve strategjike po ngrihej në prona të grabitura apo të kontestuara. Çështjet e kontestimeve për pronat në Vlorë kanë qenë të vazhdueshme. Vitin e shkuar u raportua se në gjykata kishte 403 padi për çështje të tilla.

1 koment

Adresa juaj e emailit nuk do bëhet publike.

Lajme te ngjashme