Vendet e G7 janë zotuar të rrisin kontributet e tyre të financave për çështjen e ndryshimit të klimës duke u përpjekur të përmbushin premtimin e shpenzimit të 100 miliardë dollarëve në vit për të ndihmuar vendet e varfëra të ulin emetimet e karbonit dhe të përballen me ngrohjen globale.
Pjesë e planeve të financimit janë projekte të infrastrukturës në vendet në zhvillim dhe kalimi në teknologjinë e rinovueshme dhe të qëndrueshme, raporton Reuters.
“Si kombe demokratike ne kemi një përgjegjësi për të ndihmuar vendet në zhvillim të korrin përfitimet e rritjes së qëndrueshme përmes një sistemi të drejtë dhe transparent. G7 ka një mundësi të paprecedentë për të drejtuar një Revolucion Industrial të Gjelbër, me potencialin për të transformuar mënyrën se si jetojmë.”, tha kryeministri britanik Boris Johnson në një deklaratë.
Ai nuk dha detaje ose shifra për angazhimet e reja.
Vendet e zhvilluara ranë dakord në Kombet e Bashkuara në 2009 për të kontribuar së bashku 100 miliardë dollarë çdo vit deri në vitin 2020 në financën e çështjes së klimës në vendet më të varfra, shumë prej të cilëve po përballen me ngritjen e nivelit të deteve, stuhive dhe thatësirave nga ndryshimi i klimës. Ky synim nuk u përmbush.
Udhëheqësit e G7 pritet gjithashtu të përcaktojnë veprime për të ulur emetimet e karbonit, duke përfshirë masa të tilla si përfundimi i pothuajse të gjithë mbështetjes së drejtpërdrejtë të qeverisë për sektorin e energjisë së karburanteve fosile dhe heqjen e makinave me benzinë dhe naftë.
Disa grupe të gjelbërta si Greenpeace UK nuk u bindën nga deklaratat e G7 duke thënë se janë premtime të ricikluara dhe se asgjë nuk merret e mirëqenë deri sa të miratohen fondet për projektet konkrete.
