Vendoset sot hapja e negociatave me Shqipërinë, ministrat e BE-së video-konferencë për të arritur kompromisin

Nga Exit News
Vendoset sot hapja e negociatave me Shqipërinë, ministrat e BE-së video-konferencë për të arritur kompromisin

Ministrat e Jashtëm të vendeve anëtare të BE-së do të mbajnë sot një takim me video-konferencë për të arritur një dakordësi për hapjen e negociatave me Shqipërinë dhe Maqedoninë e Veriut.

Lajmin e konfirmon Financial Times.

Një zyrtar i BE-së u shpreh për FT se “ky vendim tregon se BE e ka ende në fokus procesin e zgjerimit” pavarësisht krizës së koronavirus.

Me shumë gjasa, sipas një draft-vendimi përgatitur nga Presidenca e BE-së dhe që Exit News e ka parë, Bashkimi Europian do të hapë negociatat me Shqipërinë dhe Maqedoninë e Veriut.

Sipas draftit, Franca dhe Holanda, dy shtetet që kanë kundërshtuar më fort hapjen e negociatave me Shqipërinë e Maqedoninë e Veriut, duket se kanë zbutur qëndrimin e tyre.

Greqia po ashtu, ka qenë një prej vendeve që nuk ka qenë dakord me vendimin për hapjen e negociatave, por burime diplomatike thanë se Athina ka dhënë miratimin e saj pasi drafti i fundit kishte një gjuhë më të fortë për mbrojtjen e pakicave kombëtare në Shqipëri.

Nëse asnjë vend nuk kundërshton, vendimi pritet të miratohet zyrtarisht në mes të javës. Vendimi duhet të jetë unanim, pra të mbështetet nga të 27 vendet e BE-së.

Ky do të jetë një sinjal pozitiv për 2 vendet të cilat prej disa vitesh nuk marrin votat e vendeve të BE-së për hapjen e negociatave.

Këtë javë ishte parashikuar të mbahej dhe samiti i Zagrebit për Ballkanin Perëndimor i  BE-së drejtuar nga Kroacia. Nuk dihet ende nëse samiti do të zhvillohet online apo do të shtyhet për në një moment të dytë.

LEXO  Najada Como dorëhiqet nga deputete

Lajme te ngjashme