![n Vila Sarajet braktiset nga institucionet pas djegies](https://exit.al/wp-content/uploads/2021/08/237418643_10158562845834865_7030728379661791819_n.jpg)
Vila Sarajet është braktisur nga institucionet pasi është djegur një natë më parë.
Vila Sarajet është monument i kulture i kategorisë së parë megjithatë kjo nuk pengoi personat që i vunë zjarrin ta digjnin dhe të largoheshin pavarësisht se vila është në qendër të Tiranës.
Mëngjesin e të martës në vendngjarje ndodhen vetëm dy policë bashkiakë dhe një roje siç ka përcjellë përmes pamjeve në rrjete sociale pedagogu i gazetarisë Ervin Goci.
Asnjë hetues i prokurorisë nuk ndodhej në mëngjes në godinë dhe asnjë përfaqësues i Ministrisë së Kulturës e cila ka përgjegjësi mbi godinën megjithëse ajo nuk është shpronësuar ende.
Madje as pronarët e vetë godinës nuk janë shfaqur.
Sipas Gocit të vetmit persona që hyjnë e dalin nga godina janë dy policët bashkiakë megjithëse Bashkia Tiranë nuk e ka në dorëzim godinën dhe vendi ende cilësohet si skenë krimi.
Policia e Tiranës në njoftimin për djegien e vilës shkruan se është djegur një lokal në rrugën ‘Abdi Toptani’, pavarësisht se ajo ka kohë që nuk funksionon më si e tillë dhe është një nga monumentet më me vlerë të kryeqytetit.