Kryeministri i Maqedonisë së Veriut, Zoran Zaev, kërkoi votëbesim nga Kuvendi për qeverinë që ai drejton nga 31 gushti i vitit të kaluar.
Zaev tha se kërkesën e ka paraqitur pas deklaratave të vazhdueshme të liderit të opozitës maqedonase, kryetarit të VMRO DPMNE-së, Hristijan Mickoski, se shumica parlamentare e ka humbur mbështetjen dhe se vendi duhet të shkojë në zgjedhje të parakohshme parlamentare.
“Ky është momenti kur duhet të shohim se kush sa numra ka në Kuvend, ne apo opozita, e cila vazhdimisht pretendon se do ta rrëzojë qeverinë dhe do të formojë një shumicë të re. Lajmet e rreme dhe bllokadat krijojnë pasiguri politike. Unë nuk do ta lejoj këtë, andaj edhe kërkoj votëbesim për qeverinë”, tha të mërkurën para deputetëve kryeministri Zoran Zaev.
Votëbesimi do të bëhet pa debat, pasi Zaev e paraqiti kërkesën në bazë të nenit të rregullores mbi punën e Kuvendit, që nuk parasheh debat, por vetëm votim për punën e Qeverisë.
Votimi pritet të bëhet më vonë.
Opozita e kritikoi këtë propozim dhe tha se Zaev ka frikë të përballet me fjalimet e opozitës për dështimin e punës së Qeverisë.
“Ju keni frikë të përballeni me argumentet tona që dëshmojnë dështimet e kësaj Qeverie në të gjitha sferat. Ju keni dështuar ta menaxhoni vendin në krizën me pandeminë, ju keni dështuar në luftën kundër korrupsionit, madje jeni zhytur vetë në korrupsion dhe keqpërdorime të tjera të shumta. Dështimet janë evidente, andaj edhe duhet të përballeni me argumentet tona dhe jo të ikni nga përballja me to”, tha kryetari i grupit parlamentar të VMRO DPMNE-së, Nikolla Micevski.
Edhe opozita shqiptare drejtoi kritika ndaj Zaevit për propozimin që votëbesimi i qeverisë të bëhet pa debat.
“Qeveria tenton t’i fshehë dështimit në çdo lëmi të jetës: dështimet në arsim, shëndetësi, shkeljen e të drejtave të shqiptarëve, përfshirë edhe të drejtën për protestë. Për këtë them se opozita duhet të dëgjohet për punën e qeverisë. Kjo është kopje e asaj që ka ndodhur në regjimin e kaluar”, tha Skënder Rexhepi nga koalicioni opozitar shqiptar.
Nëse votohet për mosbesim, kryeministri jep dorëheqjen dhe brenda 24 orëve nga votimi i mosbesimit duhet ta njoftojë kryetarin e Kuvendit.
Ky i fundit menjëherë e informon presidentin e Republikës për votimin e mosbesimit në qeveri dhe dorëheqjen e kryeministrit.
Qeveria që drejtohet nga kryeministri Zoran Zaev numëron 62 deputetë nga 120 sa numëron Kuvendi i Maqedonisë së Veriut.
Mocioni i votëbesimit vjen në një moment të mirë për Zaev, i cili është cituar në raportin e Freedom House mbi lirinë në botë, si një “qeveri reformiste“.
Kjo vlerësohet të jetë arsyeja pse Maqedonia e Veriut u rrit nga pozicioni i 63 në atë 66 në renditjen e vendeve të lira.
