Shqipëria renditet e dyta në Evropë për nivelin më të lartë të vrasjeve me armë zjarri. Studimi, bërë nga dy hulumtuese zvicerane, për vrasjet e dhunshme dhe me armë zjarri u publikua sot në Qendrën e Studimeve të Sigurisë. Në studim janë marrë të dhënat zyrtare të të gjithë vendeve evropiane që prej vitit 2004.
Shqipëria renditet e dyta në Evropë me 3 vrasje me armë zjarri për 100 mijë banorë. Vetëm Rusia ka një nivel më të lartë se ne, prej 3,8 vrasjesh për 100 mijë banorë.
Studimi tregon se numri i vrasjeve pa armë zjarri në Shqipëri është ulur.
Të dhënat zyrtare të Shqipërisë mungojnë për 5 vitet e fundit dhe raportet e qeverisë nuk përcaktojnë nëse vdekjet janë shkaktuar nga armët e zjarrit apo jo.
Megjithatë raporti i Prokurorit të Përgjithshëm mbi situatën e krimit në vend për vitin 2015, raportonte një total prej 217 personash të dënuar për vrasje, pa u specifikuar nëse janë vrasje me armë zjarri apo jo. Duke pasur parasysh të dhënat e studimit, dhe në vitin 2015, shkalla e vrasjeve me armë zjarri duhet ti afrohet një norme prej 3 vrasje për 100 mijë banorë.
Gazetari Jack Davies, në një artikull për Politico, në janar 2016, jep një vështrim më të thellë për shkaqet e numrit të lartë të vrasjeve me armë zjarri. Ndër të tjera në artikull përmendet rasti i deputetit socialist Armando Prenga, i cili pavarësisht se akuzohet për plagosje me dashje me armë zjarri, vazhdon të jete deputet në Kuvend.
