Këtë javë kanë ndodhur këto ngjarje:
Politikë
Presidenti Thaçi kërkesë Shqipërisë: Jepini nënshtetësinë shqiptarëve të Kosovës
Presidenti kosovar Hashim Thaçi i propozoi Presidentit Meta, gjatë një takimi dypalësh, që Shqipëria t’i japë nënshtetësi shqiptare shtetasve të Kosovës, për të evituar procedurat për marrjen e vizave dhe lëvizjen e lirë jashtë shtetit.
Basha akuzon Ramën për lidhje me krimin e organizuar
Gjatë seancës parlamentare, Kryetari i PD-së Lulzim Basha akuzoi Kryeministrin Rama se është i lidhur personalisht me krimin e organizuar, e për këtë arsye po fut në kolaps kuvendin.
41 ton beton në Parkun Kombëtar të Butrinit
41 ton beton do të hidhen në Parkun Kombëtar të Butrintit, në pjesën e njohur si Akropola, pranë Kullës Veneciane.
Kërkesat e KE, pakica bullgare në Shqipëri do të njihet si minoritet
Pakica bullgare në Shqipëri do të njihet së shpejti si minoritet, me të gjitha të drejtat, nga Kuvendi. Komisioni i Ligjeve miratoi projektligjin për pakicat kombëtare, ku përfshihej dhe njohja e bullgarëve që jetojnë në Shqipëri si minoritet. Kuvendi pritet ta miratojë projektligjin në seancat e ardhshme.
Barometri i Ballkanit: Korrupsioni dhe varfëria mbizotërojnë në Shqipëri
Barometri Ballkanik tregon se gjysma e të intervistuarve shqiptarë nuk janë në gjendje të ngrohin shtëpitë e tyre, ndërsa 69 për qind nuk kanë para qoftë dhe për një javë pushimi në vit. 39 për qind e të intervistuarve nuk janë në gjendje të paguajnë qiranë e tyre ose faturat e shërbimeve.
Ekonomi
Qeveria — TVSH për biznesin e vogël
Kryeministri Rama propozoi futjen në sistemin e TVSH edhe për biznesin e vogël me xhiro nën 5 milionë lekë. Në vendin tonë një biznes përfshihet në pagesën e TVSH kur realizon një xhiro vjetore mbi 5 milionë lekësh ose 36 mijë euro në vit.
Nxirren në ankand pronat e firmave piramidale
Ministria e Financave nxorri në ankand rreth 10 fabrika, linja prodhimi e magazina në pronësi të ish firmave piramidale “Vefa” dhe “Kamberi”.
Llotaria Amerikane, bie serveri
Për 24 orë faqja e aplikimit për Llotarinë Amerikane ka qënë jashtë funksionit. Sipas një njoftimi në faqe, thuhet se serverat kanë rënë dhe luten që aplikuesit të provojnë sërish në një moment të dytë, sapo ajo të rregullohet, pa specifikuar se kur mund të rregullohet.
Richard Thaler fiton çmimin Nobel në Ekonomi
Richard Thaler u shpall fituesi i çmimit Nobel për Ekonominë, për kontributin e tij në ekonominë e sjelljes.
Kronika
Brindizi — Policia italiane sekuestron 1,5 ton drogë
Policia italaine sekuestroi në Brindizi një kamion me 1, 5 ton drogë. Si dhe arrestoi dy persona, një shqiptar me inicialet N. S. 32 vjeç dhe italianin me inicialet M. M. 40 vjeç.
Gjykata e Durrësit liron shtetasin turk në këkrim nga Turqia
Gjykata e Durrësit liroi shtetasin turk Muhammet Yasir Aydogmus, për te cilin autoritetet turke kanë nxjerrë urdhër-kërkimi ndërkombëtar. Ndaj tij, një gjykatë në Stamboll ka caktuar masën “arrest me burg” për “pjesëmarrje në organizatë terroriste të armatosur”.
Atentat mafioz në Lushnje
Dy persona kanë mbetur të vrarë dhe dy të tjerë u plagosën nga një atentat mafioz në Lushnje. Atentatorët u identifikuan nga policia por ende nuk janë arrestuar.
