Kryetari i Lëvizjes Ura në Mal të Zi, Dritan Abazoviç, pjesë e qeverisë së re, ka deklaruar se do të dalë nga koalicioni qeverisës, nëse nuk do të respektohet marrëveshja mes partive.
Në një deklaratë për emisionin Opinion, Abazoviç tha se vota e tij “do të shkojë drejt BE, drejt luftës kundër korrupsionit dhe demontimit të regjimit të fundit në Evropë.”
Qeveria e re pro-serbe e Malit të Zi ka bërë të ditur se pavarësisht lidhjeve me Serbinë e Rusinë, do të mbajë qëndrime pro-perëndimore.
Madje në marrëveshjen për parimet e koalicionit të ri qeveritar, theksohej se qeveria e re do t’i përmbahet të gjithë detyrimeve që Mali i Zi ka në arenën ndërkombëtare dhe do të ndërmarrë të gjitha reformat e nevojshme drejt integrimit europian.
Një tjetër parim për të cilin anëtarët e qeverisë së re kanë rënë dakord është mosvënia në dyshim e pavarësisë së Kosovës dhe mostërheqja e njohjes së saj.
Më para Abazoviç ka deklaruar se nuk do të qëndrojë në qeveri dhe nëse ajo do të tërheqë njohjen e pavarësisë së Kosovës.
