Shoqata e Transportit Publik ka kërkuar vaksinimin e punonjësve, me grupet e riskut. Në një letër dërguar kryeministrit Rama dhe ministres së Shëndetësisë Manastirliu, Shoqata u shpreh se punonjësit e transportit urban çdo ditë përballen me rrezikun e infektimit.
“Ata janë në kontakt të vazhdueshëm me njerëz të ndryshëm ndaj kërkojmë vaksinimin e tyre me grupet e riskut”, shkruhet në letrën e Shoqatës.
Vaksinimi në vend nisi në janar me vaksinimin e mjekëve, më pas me njerëzit mbi moshën 80 vjeç, e duke vazhduar me mësuesit. Ndërsa javën e kaluar nisi vaksinimi masiv i popullsisë mbi moshën 70 vjeç. Sot, nisi vaksinimi i gazetarëve të terrenit dhe nesër nis vaksinimi i policëve.
