Presidenti slloven, në një konferencë të përbashkët me presidenten e Kosovës, Vjosa Osmani la të kuptohet se ai nuk ka nxitur idenë për ndryshimin e kufijëve në Ballkan.
Ai shtoi se ka qëndrim krejt të kundërt dhe se alternativa të tilla nuk duhet të besohen.
“Unë dëshiroj ti bind bashkëbiseduesit që të përqëndrohen në procesin e zgjerimit dhe reformave,” u shpreh Pahor.
Më herët, presidenti slloven pohoi se sheh një ulje të besimit mes njerëzve në perspektivën evropiane të rajonit, për shkak të ngadalësimit të zgjerimit të BE-së.
Ai theksoi se zgjerimi i BE-së në hapsirën e Ballkanit Perëndimor është “domosdoshmëri gjeopolitike”.
Pahor deklaroi se shpreson që BE të kuptojë se përshpejtimi i procesit, jo vetëm rrit besimin e njerëzve te perspektiva evropiane, por nxit vullnetin për reforma dhe ul mundësinë e ideve të rrezikshme, si ndryshimi i kufijëve.
Ndërkohë, ai deklaroi mbështetjen e Sllovenisë për dialogun Kosovë-Serbi, duke u shprehur se “procesi i reformave ecën më shpejt, nëse problemet mes popujve zgjidhen me vullnet të sinqertë”.
Pahor shprehu besimin te qeveria e re e Kosovës, për t’i dhënë një nxitje procesit.
Ishte e rëndësishme, tha presidenti slloven, që në konferencën e Brdo Brijonit vendet e rajonit të tregonin se ishin të afta të arrinin në qëndrime të përbashkëta për perspektivën evropiane.
