Grevistët e Zharrzës, që mbërritën sot në Tiranë pas katër ditësh maratonë, janë përplasur me policinë për ngritjen e një çadre përpara Ministrisë së Energjitikës. Sipas policisë, qytetarët nuk kanë marrë leje në polici për të protestuar apo për të ngritur çadër. Një prej grevistëve u dërgua në spital me dëmtime të lehta.
Banorët thanë se ata nuk do të largohen nga ministria pa marrë përgjigje për shqetësimet e tyre: dëmshpërblimet për banesat e dëmtuara nga shpimet për naftë të Bankers Petroleum dhe ndalimin e këtyre shpimeve.
Pak orë më parë, grevistët u takuan me zëvendëskryeministrin Niko Peleshi. Ata u shprehën se biseda ishte pozitive, se ishte rënë dakord që disa ekspertë të verifikojnë dëmet e shkaktuara në shtëpitë e banorëve të fshatit Zharrza. Gjithsesi, grevistët theksuan se ata nuk do të largohen nga Tirana deri në përfundim të të gjithë procedurave të nevojshme.
