Deputeti socialist Ben Blushi ka folur, sot paradite, para mediave në lidhje me kandidimin e tij për kreun e PS-së, nëse në parti do të zhvillohen zgjedhje për kryetarin.
Në prononcimin e tij, Zoti Blushi foli për disa nga çështjet kryesore për të cilat ai do të konkurojë.
Më poshtë janë shkëputur disa nga thëniet e tij kryesore:
- Kandidimi “nuk është çështje personale e imja, por dinjitoze në radhë të parë, është çështje lirie e të drejtave.”
- “Dua t’u them të gjithëve të mos druhen, sepse kjo nuk është çështje frike.”
- “Besoj se kjo garë, ky sens lirie nuk shërben vetëm mua. Në radhë të parë i shërben PS-së që të jetë një parti më e hapur.”
- Gara për kryetarin e PS-së “i shërben Shqipërisë. Nëse ne i japim modelin e një gare të hapur është mirë për të gjithë shoqërinë.”
- Qëllimi im është “të ndryshojmë mënyrën si funksionon PS. Ta bëjmë më liberale.”
- Socialistët që e kundërshtuan në vitin 2009, Edi Rama i largoi dhe “i zëvendësoi me banditë, me njerëz që vijnë në parlament me pistoletë, me njerëz që kërkojnë pronën publike me pistoletë, me njerëz që plagosin për interes privat. I ka zëvendësuar me biznesmenë, që sot i ushqen me tendera. Dhe këta blejnë me lekët e tenderave blejnë votat për Edi Ramën brenda partisë.”
- Partia Socialiste “është një parti kaotike, që i shërben disa interesave që janë klienteliste por as të majta as të djathta.”
- “Investime të huaja nuk ka, jo se taksat janë të larta, por që të investosh në Shqipëri duhet të trokasësh në një derë. Të jesh klientelë me dikë.”
- “Kjo parti nuk mund të jetë klienteliste.”
