Dy persona të tjerë janë identifikuar me COVID-19, të shtunën në mëngjes, duke e çuar numrin total në 35 të sëmurë.
Rasti i parë është një i moshuar, i cili është trajtuar për sëmundje të tjera për rreth dy javë në Spitalin e Sëmundjeve të Mushkërive Shefqet Ndroqi në Tiranë, i cili është testuar për koronavirus vetëm pasi ka shfaqur simptoma, ditë pas shtrimit.
Ai është transportuar në Spitalin e Sëmundjeve Infektive të Tiranës në gjendje të rënduar shëndetësore.
Rasti tjetër është një punonjës i të njejtit spital, i cili duket se e ka marrë virusin nga kontaktet me pacientë të sëmurë. Profesioni dhe mosha e punonjësit janë ende të panjohura.
Gjendja e tij është e mirë dhe ai është vetëizoluar.
Këto dy raste nxjerrin në pah një nga problemet më të mëdha të ballafaqimit me sëmundje COVID-19: mospasja e shenjave të qarta, çon shpesh në diagnostikimin me vonesë të të sëmurëve, të cilët mund të vizitohen dhe trajtohen fillimisht për probleme të tjera nga personeli i pambrojtur mjekësor.
Sot, rreth orës 11:00 pritet përditësimi ditori nga Instituti i Shërbimit Publik i rasteve të reja të 24 orëve të fundit, ku pritet që të ketë rritje të ndjeshme të numrit të të infektuarëve të diagnostikuar.
