Presidenti Ilir Meta i bëri thirrje qytetarëve që të respektojnë dhe zbatojnë masat dhe kufizimet e qeverisë, si e vetmja mënyra për të ndalur përhapjen e Covid-19.
“Në këtë mënyrë jo vetëm mbrojmë shëndetin tonë, por ndihmojmë njëkohësisht mjekët dhe personelin shëndetësor, që po sakrifikon dhe rrezikon për shëndetin e të gjithëve ne,” shkruan Zoti Meta në Facebook.
Presidenti i kujtoi dhe qeverisë që të vlerësojë masat e marra, të sigurohet që ato janë në përputhje me Kushtetutën dhe t’i përgjigjen vetëm nevojës dhe urgjencës së përballimit të kësaj situate të vështirë.
Sot kryeministri Rama njoftoi një masë të re: ushtria dhe policia bashkiake do të angazhohet për të ruajtur distancën mes qytetarëve në tregje.
Këto masa u lajmëruan pasi në shumë media u raportua se të shtunën ka pasur një dyndje të qytetarëve që nuk zbatonin asnjë masë sigurie në tregje.
