Shtyhet për herë të katërt seanca në Gjykatën e Posaçme të Apelit për ish-ministrin e Brendshëm Saimir Tahiri e ish-drejtorit të Policisë Vlorë Jaeld Çela.
Trupa e përbërë nga gjykatëset Albana Boksi, Nure Dreni dhe Nertina Kosova vendosën shtyrjen e seancës pasi kjo çështje nuk është urgjente dhe mund të shtyhet për në një moment të dytë – duke qenë se gjykata po punon vetëm për çështjet urgjente për shkak të pandemisë së Covid-19.
Në seancë nuk mori pjesë asnjë prej të akuzuarve dhe as avokatët mbrojtës të tyre. Ende nuk ka një datë për seancën e radhës.
Më 20 shtator 2019, ish-ministri Tahiri u shpall fajtor nga Gjykata e Krimeve të Rënda për shpërdorim detyre, ndërkohë akuzat për bashkëpunimin dhe trafik droge me bandën e Habilajve u rrëzuan.
Ai u dënua me 5 vite burg, të ulura në 3,4 vite shërbim prove.
Ky vendim u apelua si nga prokuroria e cila kishte kërkuar 12 vite burg, ashtu dhe nga ish-ministri i cili kërkon pafajësinë.
Vendimi i gjykatës u cilësua nga Ambasada Amerikane si shkurajues.
Ish-ministri ka kontraktuar një kompani amerikane për të lobuar SHBA për të tërhequr deklaratat publike të personelit të ambasadës në Shqipëri, me pretendimin se ato mund të kenë ndikuar vendimin e autoriteteve.
