Kreu i PD-së Lulzim Basha i uroi sot maturantëve suksese në provimet e maturës.
Nga Elbasani, Basha u shpreh:
“Dua të uroj të gjithë maturantët suksese në provimet që sapo kanë nisur. Nga qyteti i Normales, nga zemra e Shqipërisë, nga Elbasani, qyteti nga i cili kam patur nderin t’i përfaqësoj disa vite në parlament.
Në këtë qytet me një vend të veçantë në historinë e arsimit shqiptar, Elbasani i Pedagogjikes, Normales, i intelektualëve që kanë dhënë kaq shumë arsimin, është vendi më i veçantë për të uruar maturantët.”
Basha tha se i takon politikës t’i sigurojë një të ardhme të mirë dhe të sigurtë të gjithë të rinjve:
“Sfida juaj është të dilni sa më mirë në këto provime.
Sfida jonë është t’ju sigurojmë një të ardhme sa më të sigurtë në karrierën tuaj si studentë në universitete dhe t’ju sigurojmë një ekonomi që punon për ju e t’ju japë vende pune, sa më shumë kënaqësi dhe shance për të ardhmen e sa më pak stres e mundime për prindërit tuaj.”
Sot mbi 31 mijë maturantë në gjithë vendin po bëjnë provimin e parë të maturës, atë të gjuhës së huaj.
