Pagimi i taksës së ndikimit në infrastrukturë nuk do të jetë më kusht që qytetarët të marrin dokumentet e legalizimit të ndërtimeve pa leje.
Komisioni i Ekonomisë ka miratuar një ditë më parë propozimin e tre deputetëve socialistë për të hequr këtë kusht, me argumentin se po vonon procesin e legalizimit për shumë qytetarë.
Ndryshimi i kushteve të marrjes së dokumenteve të legalizimit nuk do të thotë që kjo taksë nuk do të paguhet, por vetëm që pagesa e saj nuk është kusht për legalizimin.
Taksa e ndikimit në infrastrukturë është sa 0.5 për qind e vlerës së investimit. Për një shtëpi me vlerë 10 milionë lekë, qytetari duhet të paguajë 50 mijë lekë taksë.
Vendimi i komisionit pritet të votohet në parlament në seancën e radhës.
