Administrata e Ushqimit dhe Barnave në SHBA (njohur rëndom si FDA) lëshoi një analizë të vaksinës COVID-19 Johnson & Johnson të mërkurën në mëngjes që mbështet autorizimin e saj për përdorim urgjent.
Të premten, një panel këshilltarësh për agjencinë do të takohet për të vlerësuar vaksinën dhe për të bërë një rekomandim nëse duhet dhënë autorizmi për përdorim të menjëhershëm.
Nëse kjo ndodh, vaksina Johnson & Johnson, do të jetë e treta, pas atyre të Pfizer-BioNTech dhe Moderna, që do të bëhet e disponueshme në ShBA.
Vaksina Johnson & Johnson ka disa përparësi. Imunizimi me vaksinën Johnson & Johnson kërkon vetëm një dozë, ndryshe nga dozimi dyfish për vaksinat Pfizer dhe Moderna.
Ajo gjthashtu nuk kërkon kushte të veçanta për trasportimin dhe ruajtjen.
Shqyrtimi i FDA vuri në dukje se në një studim ndërkombëtar me rreth 40,000 persona, gjysma e të cilëve morën vaksinën dhe gjysma e të cilëve morën placibo, vaksina Johnson & Johnson rezultoi 66% efektive në parandalimin e rasteve nga të moderuar deri të rëndë të COVID-19 . Studimi u krye në Sh.B.A, Amerikën Latine dhe Afrikën e Jugut.
Agjencia gjithashtu tha se vaksina ka një “profil të favorshëm sigurie” dhe se nuk “ishte identifikuar ndonjë shqetësim specifik i sigurisë që do të përjashtonte lëshimin e një EUA (Autorizim për përdorim emergjent)”. E njëjta gjuhë u përdor edhe për vlerësimet e vaksinave të kompanive Moderna dhe Pfizer-BioNTech, të cilat u autorizuan në dhjetor për përdorim emergjent.
Vlen të vihet në dukje se përqindja e efikasitetit për parandalimin e COVID-19 të vaksinës Johnson & Johnson është më e ulët se 95% të Pfizer dhe 94% për Moderna .
