Kryetari i Partisë Demokratike Lulzim Basha përsëriti sot vendimin e opozitës për të anuluar koncesionet dhe partneritetet publike private korruptive, me ardhjen në pushtet.
Gjatë një takimi me fermerët e Lushnjes dhe Divjakës, Zoti Basha premtoi:
“Themeli i politikës sonë për të mbështetur fermerët, për të çliruar fermerët nga ajo zgjedhë, është kjo: paratë që sot shkojnë tek ata, tek ai grusht njerëzish për të cilët punon e gjithë Shqipëria, që ditën e parë të gjitha këto kontrata hajdutërie –se s’dua t’u them koncensione e PPP, se s’janë koncensione, as PPP – ato që ditën e parë do të anulohen.”
Kreu i opozitës tha se të gjithë përgjegjësit që përmes koncesioneve korruptive kanë çuar para nga buxheti i shtetit tek miqtë e kryeministrit Rama do të mbajnë përgjegjësi dhe paratë do t’i rikthehen qytetarëve:
“Ne do të ngremë një mekanizëm që do të gjurmojë ku i kanë çuar ato para, në çfarëdo forme, edhe po t’i kenë ngurtësuar, dhe një gjë ju siguroj: ato qindra milionë euro që sot gllabërohen në forma të ndryshme, do të kthehen të gjitha në shërbim të njerëzve.”
Duke folur më konkretisht për bujqësinë e blegtorinë, Basha tha se opozita do të subvencionojë direkt fermerët pas pasur nevojë për ndërmjetësim nga ‘burokratët dhe hajdutët’:
“Zgjidhja e duhur për fermerët që të punojë rehat është zerimi i kostos së prodhimit dhe kjo bëhet vetëm me skemën e subvencioneve direkte.
Blegtoria është totalisht e braktisur duke nxitur më shumë braktisjen e zonave rurale. Fshatrat tona zbrazen që të nxitet importi i produkteve nga jashtë sepse kontrollohet nga 4-5 oligarkë dhe kjo bie në kurrizin tuaj. Dixhitalizimi i bujqësisë është jetësor. Me një çip shmang burokratët dhe hajdutët, duke ofruar subvencionet direkte.”
