Bilanci javor i rajonit – 4 mijë të infektuar dhe 100 viktima të tjera me Covid-19

Nga Exit News
Bilanci javor i rajonit – 4 mijë të infektuar dhe 100 viktima të tjera me Covid-19

Numri i të infektuarve me Covid-19 në Ballkanin Perëndimor njohu rritje me rreth 4 mijë persona javën e fundit, ndërsa pati rreth 100 viktima të tjera.

Krahasuar me një javë më parë tashmë rajoni ka mbi 12 500 persona të infektuar, 2 706 të shëruar dhe 318 viktima.

Serbia dhe Maqedonia e Veriut janë vendet më të prekura ndërsa Kroacia po paraqet shenja se epidemia po përmbahet.

Në një javë Serbia raportoi 2 576 të infektuar të tjerë me Covid-19 duke e çuar totalin në 6 630 të infektuar, prej të cilëve 125 kanë vdekur – 40 më shumë se javën e shkuar.

Maqedonia e Veriut u bë vendi i dytë me më shumë viktima në rajon – 54 të vdekur. Me statistika Maqedonia e Veriut ka vdekshmërinë më të lartë 26 vdekje për 1 milionë banorë.

Gjatë kësaj jave autoritetet maqedone raportuan 16 vdekje të tjera ndër pacientët me Covid-19 ndërsa pati 371 raste të reja – totali 1225.

Bosnje e Hercegovina raportoi gjatë kësaj jave 279 të infektuar të tjerë me Covid-19 (1 309 totali) 10 viktima (49 totali) dhe 175 të shëruar (totali 381).

Kroacia raportoi 231 raste të reja me Covid-19 (1 881 totali) 22 viktima (47 totali) dhe 371 të shëruar (771 totali).

Në Kosovë pati 4 vdekje ndërsa u raportuan 199 të infektuar të tjerë – totali 561.

Shqipëria raportoi 117 të infektuar të tjerë (totali 584), 3 viktima (totali 26) dhe 95 të shëruar (327 totali).

Vlen të thuhet se gjithashtu vdiqën edhe 4 persona të infektuar me Covid-19, por autoritetet nuk i përfshinë në statistikat e përgjithshme pasi nuk kishin manifestuar simptoma.

Në Mal të Zi gjatë kësaj jave pati 38 raste të reja me Covid-19 (311 totali), 2 viktima (5 totali) dhe 50 të shëruar (55 totali).

Bilanci i Covid në Ballkanin Perendimor 20 prill
Bilanci i Covid në Ballkanin Perendimor 20 prill

Testet dhe të shëruarit

Serbia mbetet vendi që po kryhen më shumë teste në rajon. Javën e fundit ajo pothuajse dyfishoi numrin e personave të testuar nga 20 mijë në mbi 40 mijë, kjo reflekton edhe në bilancin e përgjithshëm të të infektuarve.

Pas Serbisë është Kroacia që po kryen më shumë teste në rajon, rreth 9 mijë brenda javës së fundit.

Për sa i përket Shqipërisë dhe Kosovës ato kanë kryer këtë javë nga 1 700 dhe 1 400 teste, relativisht pak krahasuar me Maqedoninë e Veriut mbi 3 500 dhe Bosnjen mbi 6 200 teste.

Sidoqoftë për sa i përket shifrave Shqipëria mbetet vendi që ka shërueshmërinë më të lartë në rajon rreth 56 për qind të të infektuarve, ndërsa Kosova vdekshmërinë më të ulët, më pak se 5 viktima për 1 milionë banorë.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>