8 pacientë të rinj me Covid-19 janë zbuluar në 24 orët e fundit, duke vazhduar trendin e 5 ditëve të fundit, me më pak se 10 të infektuar ditorë.
Pacientët e rinj janë të shpërndarë:
- 5 në Tiranë, duke e çuar totalin e të sëmurëve aktivë në 93,
- 2 në Elbasan, duke e çuar totalin e të sëmurëve aktivë në 4,
- 1 në Durrës, duke e çuar totalin e të sëmurëve aktivë në 1.
Dy të infektuarit e rinj në Elbasan janë dy raste pa lidhje me njëri-tjetrin
Një prej tyre është një 84-vjeçare nga fshati Mengel, e shtruar në spitalin Infektiv, pasi vuan nga sëmundje të tjera.
I infektuari tjetër është një 50-vjeçar, i cili punon si shofer në një kompani ndërtimi.
Ditët e fundit, ai ka marrë pjesë në një ceremoni mortore në Elbasan, ku kanë qenë të pranishëm 70-80 persona të tjerë.
Instituti i Shëndetit Publik po gjurmon kontaktet e mundshme të 50-vjeçarit.
Që prej 22 prillit, në Elbasan nuk ishte zbuluar asnjë i infektuar i ri me Covid-19. Aktualisht në qytet ka 4 të infektuar aktivë.
Në Durrës po ashtu ka një rikthim të Covid-19. Që prej 21 prillit në Durrës nuk ka pasur asnjë person të ri të infektuar.
I infektuari i ri është një kinez 71-vjeçar, i cili jeton në zonën e Plazhit në Durrës.
Nuk dihen ende detaje për të infektuarit e rinj në Tiranë.
