Kryetari i PD-së Lulzim Basha e akuzoi qeverinë se po lejon djegien e plehrave në landfillin e Fierit, që të paguajnë inceneratorin.
“Dita e katërt e katastrofës mjedisore në Fier. E njëjta skemë kriminale si në Durrës e Kavajë. Digjen plehrat, helmohen familjet, vetëm që të justifikojnë më pas pagesa të majme inceneratorëve me aksionerë mafian dhe qeveritarët e korruptuar”, shkroi Basha në Twitter.
Ai i kërkoi SPAK të hetojë padinë e PD-së për abuzim me 400 milionë euro pagesa për inceneratorët.
Basha, gjithashtu i kërkoi medias dhe qytetarëve të ngrejnë zërin se përndryshe demokracia do marrë fund.
