Rregullatori Evropian i Barnave (EMA), në një deklaratë për shtyp të martën, konfirmoi një lidhje të mundshme mes rasteve të mpiksjes së gjakut dhe vaksinës Johnson&Johnson.
Por, sërish, Rregullatori deklaroi se “përfitimet e përgjithshme të vaksinës Janssen në parandalimin e COVID-19, i tejkalojnë rreziqet e efekteve anësore“.
“Vlerësimi shkencor i EMA mbështet përdorimin e sigurt dhe efektiv të vaksinave COVID-19,” vijon më tej deklarata.
Ajo mori vendim që vaksinës t’i bashkangjitet një paralajmërim mbi mpiksjen e pazakontë të gjakut, kombinuar me nivel të ulët të trombociteve.
Në çdo rast, thuhet në deklaratë, këto raste duhet të listohen si shumë të rralla.
“Profesionistët e shëndetit dhe individët që do të marrin vaksinën, duhet të jenë të vetëdijshëm për mundësinë e rasteve shumë të rralla të mpiksjes së gjakut të kombinuara me nivele të ulëta të trombociteve të gjakut, që ndodhin brenda tre javësh nga vaksinimi,” deklaroi EMA.
Rastet janë shumë të ngjashme me ato të identifikuara për vaksinën AstraZeneca dhe sërish, nuk janë identifikuar faktor specifik rreziku.
Një nga hipotezat që po shikohet është se mpiksjet e rralla janë një përgjigje autoimune e trupit.
