Gjykata e Lartë e Amerikës ka hedhur poshtë kërkesën e presidentit Trump dhe republikanëve për të rinumëruar votat në shtetin e Pensilvanisë.
Gjykata, në një urdhër të shkurtër, refuzoi kërkesën e kongresmenit amerikan Mike Kelly, aleat i Trumpit dhe republikanët e tjerë të Pensilvanisë që nisën procesin gjyqësor pas zgjedhjeve të 3 nëntorit. Ata pretenduan se shtimi i votimit me postë në Pensilvani ishte i paligjshëm sipas ligjit të vetë shtetit.
Megjithëse gjykata e lartë tani ka një shumicë 6-3 pro republikave, përfshirë dhe tre gjyqtarë të zgjedhur prej Trumpit, kërkesa e republikanëve u rrëzua.
Pensilvania ishte një nga shtetet kryesore në vendosjen e fitores së Bidenit, i cili e mundi Trumpin, megjithëse ai e kishte fituar Pensilvaninë në zgjedhjet e 2016-ës.
Trumpi ka deklaruar herë pas here se zgjedhjet e 3 nëntorit janë manipuluar.
Anëtarët e administratës së Trumpit, si edhe aleati i tij i afërt, Prokurori i Përgjithshëm, William Barr, kanë thënë se nuk ka dëshmi për manipulim të zgjedhjeve, pavarësisht pretendimeve të Trumpit.
