Më 27 korrik, afati i fundit për deklarimin e adresës së vendbanimit, zyrat e Gjendjes Civile u dyndën nga qindra qytetarë. Qytetarët, me qëllim shmangien e gjobës prej 10 mijë lekësh të reja – që fillon të aplikohet sot për të gjitë ata që nuk kanë bërë transferimin e adresës së banimit- kanë qëndruar me orë të tëra në radhë.
Shumë prej tyre u shprehën se në mungesë të informacionit paraprak për dokumentet e nevojshme, shpesh i është dashur të rikthehen sërish në radhë pasi kishin siguruar dokumentet e nevojshme. Shpesh qytetarët janë njoftuar në moment të fundit se edhe pse i kanë siguruar dokumentet, ata duhet t’i noterizonin ato.
Qytetarët kanë kërkuar shtyrje të afatit të regjistrimit, për shkak të këtyre vonesave por duket se diçka e tillë nuk është pranuar nga Drejtoria e Gjendjes Civile.
Ministria e Brendshme njoftoi pak ditë më parë se afati i fundit i regjistrimit do të ishte 27 korriku, pas kësaj date kushdo që do të tranferojë banimin do të paguajë dhe gjobën prej 10 mijë lekësh.
Zyrtarë të Gjendjes Civile u shprehën për Panoramën se ky afat nuk mund të shtyhet pa u mbledhur parlamenti i ri. Por duket se ky fakt nuk është i vërtetë. “Brenda të gjitha kornizave ligjore, afati në fjalë mund të shtyhet me një akt normativ të Qeverisë,” shkruan Panorama.
