Liberalizimi i vizave për Kosovën nuk do të ndodhë as këtë vit, sipas një deklarate raportuesja për Kosovën në Parlamentin Evropian, Viola Von-Cramon për Kosova Press.
Ajo u shpreh se Kosova duhet të bindë vendet evropiane për liberalizimin e vizave.
“Liberalizimi i vizave është në dorën e Këshillit: Janë vendet anëtare të BE-së ata që do të duhet të japin dritën e gjelbër për liberalizimin e vizave. Sidoqoftë, nuk do të thotë që Qeveria e Kosovës nuk mund të bëjë asgjë.
Rruga përpara është të sigurohemi që Qeveria e Kosovës të përfshihet në një dialog me ato shtete anëtare, të cilat janë skeptike për momentin. Më e rëndësishmja, qeveria franceze duhet të bindet se Kosova është e gatshme për liberalizimin e vizave.
Ata duhet të sigurohen që çdo gjë që Franca ose shtetet e tjera anëtare do të kërkojnë mund të adresohet nga autoritetet kosovare, nëse mund të përcaktojnë aspekte të caktuara, pse hezitojnë deri më tani, Kosova duhet t’i përmirësojë këto aspekte”, shtoi Viola Von-Cramon.
