Komisioni Qendror i Zgjedhjeve vendosi sot të mos i heq mandatet Kryebashkiakëve të Tepelënës, Tërmet Peçi dhe të Poliçanit, Adriatik Zotkaj. Pavarësisht se ndaj tyre ka filluar hetimi nga Prokuroria për akuzën e falsifikimit të dokumentave.
Dy kryebashkiakët e majtë akuzohen se kanë fshehur dënimet në të shkuarën, në formularin e vetëdeklarimit, siç e parashikon ligji i dekriminalizimit.
Gjithashtu, KQZ ka vendosur të mos u heq mandatin 13 deputetëve, të cilët kanë deklaruar të dhëna civile më vonë se sa parashikohet në ligjin e dekriminalizimit.
Vendimi u mor nga katër anëtarët e shumicës, pasi tre anëtarët e opozitës u larguan nga mbledhja. Ato kërkuan ndarjen e diskutimeve për deputetët dhe shqyrtimin e padisë penale për kryebashkiakët. Sipas tyre nuk mund të gjykosh njëlloj gabimet civile me ato penale.
