Dy persona janë mbytur të dielën në plazhin e Spillesë dhe një tjetër në Velipojë.
Ngjarjet kanë ndodhur rreth mesditës.
Në Spille, sipas policisë dy burra rreth të 70-tave janë mbytur si pasojë e dallgëve. Viktimat dyshohet se janë turistë nga Maqedonia e Veriut.
Sekretari i Përgjithshëm i Federatës Shqiptare të “Vrojtuesit të Plazhit dhe Shpëtimit në Ujë”, Gent Lasku, tha për News 24 se në zonën e ku u mbytën dy qytetarët nuk kishte vëzhgues plazhi ndërkohë që dyshohet të jetë zhdukur një grua e cila sipas tij ka hyrë të lahet me dy të moshuarit.
Ndërsa në Velipojë është mbytur një 59 vjeçar nga Kosova.
Të enjten në plazhin e Spillesë rrezikuan të mbyteshin dy qytetarë të cilët u shpëtuan nga një vrojtues plazhi.
Po të enjten u gjet i mbytur trupi i një 22-vjeçari në plazhin e Gjirit të Lalzit i cili kishte hyrë në det për t’u larë dy ditë më parë por nuk kishte dalë dot më si pasojë e dallgëve.
Në korrik dy të moshuar humbën jetën pasi u mbytën në plazhin e Shëngjinit.
