Presidenti Ilir Meta e quan procedurën e shkarkimit të tij nga Kuvendi jo serioze. Në një deklaratë për median nga Manastiri i ‘Shën Joan Vladimirit’, në Elbasan, të premten.
Ai u përgjigj se “pas provës së 25 prillit, dhe një Kuvendi 3 herë antikushtetuese, nuk kam asnjë shqetësim”, për shkarkimin e tij.
Madje, Meta i këshilloi gazetarët të merren me gjëra serioze si hetimi i krimit zgjedhor në vend.
Ai u shpreh se të gjithë duhet t’i drejtohen zotit për “ata që nuk dinë se çfarë bëjnë dhe t’i udhëheqë të gjithë në rrugën e të mirës së përbashkët”.
Më 9 qershor Kuvendi do të votojë për shkarkimin e Presidentit. Kërkesa u nis nga 49 deputetë socialistë me justifikimin e shkeljes së paanësisë politike nga Meta, gjatë zgjedhjeve të 25 prillit.
