Ministri i Jashtëm grek Nikos Dendias do të takohet me Kryeministrin Rama, në Tiranën në 20 tetor për të diskutuar çështjen e caktimit të kufijve detarë midis Shqipërisë dhe Greqisë me Kryeministrin Edi Rama, njoftoi Euronews.
Bisedimet thuhet se do të përfshijnë përparimin e Shqipërisë në integrimin në Bashkimin Evropian.
Në javët e fundit, qeveria greke ka kërkuar që bisedimet të rinisin “sa më shpejt të jetë e mundur” midis dy vendeve.
Presioni është në rritje që kur Greqia nënshkroi marrëveshje për përcaktimin e kufijve detar me Italinë dhe Egjiptin, përkatësisht në qershor dhe gusht.
Shqipëria dhe Greqia nënshkruan një marrëveshje për përcaktimin e Shelfit Kontinental Greko-Shqiptar dhe Zonave Detare në 2009.
Sidoqoftë, ajo nuk u zbatua pasi Gjykata Kushtetuese Shqiptare e anuloi atë për shkak të shkeljeve të Kushtetutës dhe integritetit territorial.
Çështja kryesore shqetësuese në vendimin e Gjykatës ishte statusi i disa ishujve grekë, të pabanua, pa jetë ekonomike, shumë afër bregut shqiptar, të cilat marrëveshja e vitit 2009 i konsideronte si tokë Greke në fuqi të plotë.
Në 2018, negociatat midis dy vendeve rifilluan por qeveria greke ndryshoi shpejt dhe negociatat u bllokuan.
Në gusht, ministri dhe kryeministri grek riktheu temën në vëmendjen e publikut.
Dendias paralajmëroi të shtunën se “në kontekstin e perspektivës së saj evropiane”, është e rëndësishme që Shqipëria të ulet në bisedime sa më shpejt të jetë e mundur.
Muajin e kaluar, kryeministrat e të dy vendeve u takuan në Athinë për të diskutuar të njëjtat çështje.
